Een mooie reactie van Heinz Vink op De Halte over de Venlose Maria Magdalena

 Hoi Sef,

In oktoëber 2018 bin ik nao aanleiding van dien Floddergats column “Casino” veur dich truuk gegaon nao mien ganse vruge jeug en heb dich toen eine mail gesteurd euver ós ierste hoes op ’t terrein van kloeëster Bethanie.

Heej heb ik pas hieeël vuuël later begrepe det dit veurhaer in de 2^de waereld oorlog ein casino en bioscoop waas veur de officiere van Fliegerhorst Venlo-Herongen van de Duitse Luftwaffe op der Groeëte Hei.

Dit haet dich d’r toen toe gebrach um veur woensdaag 18 oktoeëber 2017 (waat vluug d’n ied) nog ein Floddergats column te schrieve met as titel “Nog ein Casino”.

Ik heb um nog, zoeëas vuuël colums van Floddergats. 

Aafgeloupe woensdaag in de Via Venlo in dien rubriek “De Halte”, hes dich mich met diene Column “Maria Magdalena” weer enne kier truuk gebrach nao utzelfde hoes dao achter op ’t terrein van kloeëster

Bethanieë, dao naeve de begraafplaats van de nónne van de “Orde der Dominicanessen van Bethanieë”.

Ut hoes is d’r neet mier, maar de herinneringe zien d’r nog waal.

Hieël dök hebbe weej vruger as kind dao in en rónd dees kapel gespeuld en as kleine (en later wat groeëtere) misdenaer met “Pater Rector” mei geloupe in de Sacraments-procssie waobeej de kapel ein belangieke “halte” waas en waobeej ’t Magdalena altaor riekelik waas versierd met blome. De opgang nao de kapel en de vloer van de kapel ware riekelik versierd met ein wónderschoën “blometapijt” gemak van gekleurd zaagsel. En dao moch allein “Pater Rector” en zien misdenaere euver loupe. Wie schoeën is det?

Maar ’t meis bezóndere aan dees kapel veur mich (en mien breurkes) waas, na is nog altied, det ózze pap dees kapel haet gebouwd, same met hölp van ein paar collega’s, allemaol in deens van kloeëster Bethanië.

Oet de door ózze pap vertelde euverleveringe, woorte de bouwmateriale met perd en ker gehaold beej de steinfebrieke in Tegele, veurnamelijk misbaksels en sintels, want det krege de nónne veur niks !

In ’t veurjaor van 2021 hebbe Marij en ik, same met diene vrind Ton Tesink, nog wat foto’s gemak van wat plaatse op ’t terrein van Bethanië. Dit as fielesetatie veur de 70^ste verjäördaag van mien aldste broor. Heejbeej haet Ton nog ózze gezonge fielesetatie veur de ingang van de Magdalena kapel opgenaome op de tillefoon

En neet allein dees grot hebbe ze gebouwd. In de hook van de more langs de Bethaniëweg en de Beckersweg ligt ook nog de Maria grot. Oetgeveurd as ein  “Lourdes-grot”, nów ouk gans door klimop euverwoekerd.

Allemaol jeugherinneringe en historie.

Danke veur ’t in herinnering bringe heej van dezen tie doet mien vruugste jeug.

Ik heb d’r ein paar foto’s beej gedaon van de beide bouwwerke. (Ik steur nog eine volgende mail met de foto’s van de Lourdes grot.)

Groetjes en wies ’t weer ens is.

Heinz Vink

Dank je wel Heinz, voor deze mooie herinneringen - Sef Derkx